Sarapa-e-Muhabbat

      “Kya ker rahi ho Hayat?” Hassan nay chai ka cup table per rakh ker balcony main khari Hayat se sawal kiya jo kafi dair se barish main ik haath agay kiyay khayalon main gum thi. “Haath main pani ko roknay ki koshish ker rahi hon” us nay baghair muray hi jawab day diya.  “Aray chanda hataili khuli rakho gi to pani kaise tehray ga?” Hassan nay us ki nadani per muskuratay howay kaha. “Maloom hai k nahin rukay ga, ise liyay to ‘koshish’ ker rahi hon”.  “Uffff……tum se baton main to koi jeet he nahin sakta” Hassan ki hansi main shaitani bhari thi.  Us nay bhi honton per muskurahat saja ker zameen per shore machati barish ko deekha magar us ki saharangez aankhon nay muskurahat ka saath daynay se saaf inkaar ker diya.  Harna ose kabhi bhi pasand nahin tha.  Shayad yehi wajah thi k us ki eik har nay ose tor ker rakh diya tha. 

      Aaj subah se hi us ka dil bohat bay’chain tha.  Is bar na’janay kya honay wala tha?  Raat bhar barish hoti rahi.  Deewar per lagi bayzaar ghari nay raat k teen baja diyay thay magar neend Hayat ki aankhon main to kya khuwab-o-khayalon main bhi nah thi.  Khamoshi itni thi k ose barabar main sotay howay Hassan ki dheemi aur pursukoon sanson k saath apnay dil ki dharkan bhi sunaye daynay lagi.  Wo Hassan ko utha ker us se batain kerna chahti thi.  Ose batana chahti thi apnay dil ki her baat. Os ne dil hi dil main ik dar sa mehsoos kiya. Dukh bohat dekhay thay magar dar k ahsaas us k liyay ik naya tajurba tha.

         Us ki pori koshish k bawajood aaj tak wo yeh khayal dil se nahin nikal paye k us nay Hassan k saath na’insaafi ki thi. apnay mazi ko shadi k do mahinay baad bhi apnay shareek-e-hayat se nahin keh paye thi.  Kaise batati Hassan ko k shadi se pehlai hi us ko kisi aur se bohat purkhuloos muhabbat ho gaye thi.  Muhabbat bhi kya, us nay to shayad inteha ker di thi. 

        “Kya tha us main? Kyon us ki her baat se itni muhabbat thi mujhay?” wo karwat badal ker soochnay lagi, “ ‘Usoolon per samjhota nahin ho sakta’  laikin main nay nazar andaaz ker diya tha us k her amal ko jo maire nazar main gunah tha.  Us k maan, baap, behan, bhai, sab se muhabbat ho gaye thi mujhay. Maloom nahin itni muhabbat, itni apnaiyat k baad bhi ose kya kami mehsoos howi k us nay mujhay aur maire muhabbat ko adhoora chorna hi munasib samjha”.  Waqt k saath zakham to bhar gaye thay per nishanon ko deekh ker takleef main shiddat aa jati thi.  Hassan ki mohabbat se ahsaas howa k kami us main nahin balki us main thi jo pukhuloos muhabbaton ki pehchaan nahin rakhta tha.

        Jab baychaini had se berhnay lagi to wo uth ker kitchen main pani peenay chali gaye.  Jab wapis aa ker laiti to Hassan nay uth ker muhabbat aur herani k milay julay lehjay main kaha “Gulabo….?”.  Wo baysakhta muskura di.  “tum  hansti ho nah to mujhay bohat achi neend aati hai”  aab wo hassan ko kya hisaab dayti k us ki muskurahaton main se kitni dil se hotin hain.  “Hassan, tumhain koi gila hai mujh se?” us nay bachon ki terhan poocha.   “Aaise kyon pooch rahi ho?”.  Hassan nay sawal k jawab main sawal ker dala.  “Bus aaise hi” wo keh ker khamosh ho gaye.  “Aray…mujhay tum se kya gila hoga pagli?  Aur hoga bhi to kya? Main nay tumhain maaf kiya. Kya yaad rakho gi kis sakhi se pala para hai”  Hassan nay choti si dunya k kisi badshah ki terhan kaha aur ose banhon main bhar ker dobara so gaya. 

          Aaj Hayat pehli dafa apna pora wajood us k hisaar main mehsoos ker rahi thi.  Ab na hi dil ko baychaini thi aur nah hi koi dar.  Us  nay dil hi dil main ik itmenan k saath apna sab kuch Hassan k naam ker diya.  “Aaj se maire sari chahatain tumharay naam. Maire sari muskurahatain, maire saray rang, sari khushiyan tumharay naam.  Aaj se maire hayat tumharay naam”.  Na’janay kab us nay bhi Hassan ki masoom muskurahat aur sarapa-e-muhabbat ko dekhtay dekhtay aankhain band ker lin.  Pur’sukoon dil k saath us nay hamesha hamesha k liyay Hassan ki banhon main neend ki aakhri mithaas cakh li thi.  Aaj wo hayat ki sab se bari haqeeqat se agah ho gaye thi.  Subah Hassan nay ose namaz k liyay awaz di to koi jawab nah pa ker wo heran howa.  Jab Hayat ko bayhis paya to us k haathon ko apnay haathon main lai ker wo tarap ker ro diya.  Hayat ki muthi khuli thi  jaise wo aakhri dafa waqt ko roknay ki na’kaam koshish ker rahi ho.

___Rang-e-Hayat__